امیر تیمور کی فتوحات

تیموری سلطنت کو گورکانیان بھی کہا جاتا ہے۔ اس وسیع سلطنت میں ازبکستان، ایران، کاکیشیا، میسوپوٹامیا، افغانستان، وسط ایشیا کے بیشتر حصے شامل تھے۔ برصغیر، شام اور ترکی کے بعض حصے بھی اس میں شامل رہے۔ اس کی بنیاد امیر تیمور نے 1370ء سے 1405ء تک رکھی۔ امیر تیمور چاہتا تھا کہ چنگیز خان کی طرح ایک عظیم منگول سلطنت قائم کرے۔ 1467ء میں یہ سلطنت سکڑنا شروع ہوئی مگر تیمور کی اولاد چھوٹی ریاستوں پر حکمران رہی۔ سولہویں صدی میں ایسی ہی ایک ریاست فرغانہ جو اب ازبکستان کا حصہ ہے، کے شہزادے ظہیر الدین بابر نے موجودہ افغانستان کے ایک حصہ پر حملہ کیا اور ایک چھوٹی سلطنت کی بنیاد رکھی۔ 20 برس بعد وہ برصغیر وارد ہوا اور مغل سلطنت کی بنیاد رکھی۔

تاریخ میں دو سلطنتیں تیموری سلطنت کہلاتی ہیں جن میں سے پہلی امیر تیمور نے وسط ایشیا اور ایران میں قائم کی جبکہ دوسری ظہیر الدین بابر نے ہندوستان میں سلطنت مغلیہ کے نام سے قائم کی۔ امیر تیمور دریائے جیحوں کے شمالی کنارے پر واقع شہر سبز میں 1336ء میں پیدا ہوا۔ وہ ایک اچھا سپاہی اور سپہ سالار تھا۔ وہ ترکستان اور موجودہ افغانستان کے بڑے حصے پر قابض ہونے کے بعد 1366ء میں بلخ میں تخت نشین ہوا۔ بلخ میں تخت نشین ہونے کے بعد تیمور نے ان تمام علاقوں اور ملکوں پر قبضہ کرنا اپنا حق اور مقصد قرار دیا جن پر چنگیز خان کی اولاد حکومت کرتی تھی۔ اس غرض سے اس نے فتوحات اور لشکر کشی کے ایسے سلسلے کا آغاز کیا جو اس کی موت تک جاری رہا۔

تیمور کے ابتدائی چند سال چغتائی سلطنت کے باقی ماندہ حصوں پر قبضہ کرنے میں صرف ہو گئے۔ اگلے چند سالوں میں اس نے کاشغر، خوارزم، خراسان، ہرات، نیشاپور، قندھار اور سیستان فتح کر لیا۔ 1386ء میں اس نے ایران کی مہم کا آغاز کیا اور اس مہم کے دوران پورے شمالی ایران پر قابض ہو گیا۔ روس کی مہم سے واپسی کے بعد تیمور نے 1392ء میں ایران میں نئی لشکر کشی کا آغاز کیا۔ اس مہم کے دوران اس نے ہمدان، اصفہان اور شیراز فتح کیا۔ آل مظفر کی حکومت کا خاتمہ کیا اور بغداد اور عراق سے احمد جلائر کو بے دخل کیا۔ اس طرح وہ پورے ایران اور عراق پر قابض ہو گیا۔

تیمور ایران کی مہم سے فارغ ہوکر ابھی تبریز واپس ہی آیا تھا کہ اس کو اطلاع ملی کہ تختمش نے حملہ کر دیا ہے۔ تیمور نے دریائے تیرک کے کنارے اسے شکست فاش دی۔ 1398ء میں تیمور ہندوستان کو فتح کرنے کے ارادے سے روانہ ہوا۔ ملتان اور دیپالپور سے ہوتا ہوا 1398ء کو دہلی فتح کر لیا۔ اگلے سال اس نے شام فتح کر لیا۔ 1402ء میں تیمور نے عثمانی سلطان بایزید یلدرم کو جنگ انقرہ میں شکست دی اور سمرقند واپس آنے کے بعد چین پر حملے کی تیاریاں شروع کر دیں۔ اس سفر کے دوران وہ بیمار پڑ گیا اور 18 فروری 1405ء کو انتقال کر گیا۔  

معروف آزاد