نوشیروان عادل

چھٹی صدی عیسوی میں قباد کا بیٹا خسرو اول شہنشاہ بنا۔ ساسانیوں میں یہ سب سے مشہور بادشاہ ہے اور عام طور پر نوشیروان عادل کے نام سے یاد کیا جاتا ہے۔ ساسانیوں کی رومیوں کے ساتھ ایک بار جنگ ہوئی لیکن اس کے خاتمے کے چند برس بعد پھر لڑائی شروع ہو گئی، اس لیے کہ نوشیروان کو قیصر روم جسٹینین کی فتوحات سے تشویش پیدا ہو چکی تھی۔ روم کے ساتھ یہ دوسری مرتبہ جو لڑائی شروع ہوئی وہ طویل عرصہ جاری رہی۔ صلح ہوئی جس میں: لازی (موجودہ جارجیا) کا علاقہ روم کے حوالے کر دیا گیا۔ روم نے منظور کر لیا کہ وہ ہر سال مخصوص رقم ادا کرے گا۔ تجارت کی غرض سے خاص راستے اور خاص منڈیاں مقرر کر دی گئیں۔ یہ طے ہو گیا کہ کسی معاملے کے متعلق اختلاف ہو گا تو ثالثوں کے ذریعے سے فیصلہ کرا لیا جائے گا اور دونوں حکومتوں کے درمیان سفارتی تعلقات قائم رہیں گے۔ 

قفقاز کے دروں کی حفاظت ایرانیوں کے ذمے لگ گئی۔ یہ صلح طویل عرصہ کے لیے ہوئی تھی لیکن پائیدار ثابت نہ ہوئی۔ نوشیروان نے اپنی سلطنت کو انتظامی لحاظ سے چار بڑے حصوں میں تقسیم کر دیا تھا۔ مشرقی حصہ خراسان و کرمان، مغربی حصہ عراق اور دوآبہ دجلہ و فرات، شمالی حصہ آرمینیا اور آذربائیجان، جنوبی حصہ فارس اور خوزستان۔ پیداوار کے مطابق جنسیں وصول کی جاتی تھیں۔ نوشیروان نے زمین کے لیے مستقل لگان مقرر کر دیا۔ آب یاری اور نقل و حمل کے انتظامات بہتر کیے گئے۔ فوج کی اصلاح کی گئی۔ اجنبی سیاحوں اور تاجروں کی حفاظت کی جاتی تھی۔ مسیحیوں کے ساتھ رواداری کا برتاؤ ہوتا تھا۔ علم و فضل کی سرپرستی شروع ہو گئی۔ اسی زمانے میں برصغیر سے شطرنج اور حکیمانہ کہانیاں ایران پہنچیں۔

ولیم ایل لینگر